ཡུལ་སྲོལ་གོམས་གཤིས།

རྟ་རྒྱུག་དུས་ཆེན་ནི་བོད་མིས་ཧ་ཅང་དགའ་པོ་བྱེད་པའི་དུས་ཆེན་ཞིག་ཡིན། དེའང་སྤྱི་ཚོགས་དང་ཐོན་སྐྱེད་འཕེལ་རྒྱས་བྱུང་བ་དང་འབྲེལ་བ་དམ་ཟབ་ཡོད་པ་ཞིག་ཡིན། གང་ལགས་ཤེ་ན། སྐབས་དེར་བོད་མིའི་འགྲིམ་འགྲུལ་ཡོ་ཆས་གཙོ་བོ་ནི་རྟ་ཡིན་ཅིང་ཚང་མས་རྟ་ལ་དྭངས་ཞེན་ཆེན་པོ་བྱེད་ཀྱི་ཡོད་ལ་རྟ་ནི་མི་ཚོའི་ཐོན་སྐྱེད་དང་འཚོ་བའི་ནང་མེད་དུ་མི་རུང་བའི་དངོས་པོ་ཞིག་ཏུ་གྱུར་པ་རེད།

སའི་གོ་ལའི་ཡང་རྩེར་གནས་པའི་མཚོ་བོད་མཐོ་སྒང་ནི་སྔར་ནས་ད་བར་རང་བྱུང་ཆ་རྐྱེན་ཞན་པའི་ཚད་དུ་འཇོག་གི་ཡོད་རུང་། དེ་གའི་མི་རྣམས་ནི་བློ་རིག་བཀྲ་ལ་ཁོག་རྒྱ་ཆེ་བ་དང་། དཔའ་སྟོབས་ལྡན་པ། ཐང་ཤ་དོད་པ། གཟི་མདངས་དང་ལྡན་པའི་ངང་འཛམ་གླིང་གི་ཡང་རྩེར་མི་རབས་ནས་མི་རབས་བརྒྱུད་ནས་འཚོ་བཞིན་ཡོད། ཡ་མཚན་གྱི་སྣང་ཚུལ་དེའི་རྒྱུ་དང་རྐྱེན་རྩ་འདེད་དགོས་བྱུང་ན། དཀར་ཆུའི་འཚོ་ཟས་དང་ཡང་སྒོས་ཞོའི་རིག་གནས་དང་འབྲེལ་བ་དམ་ཟབ་ཡོད།

འབྲོག་པ་རྣམས་ལ་དབྱར་དགུན་སྟོན་དཔྱིད་ཀྱི་དུས་སོ་སོར་མཚེར་ས་སོ་སོར་ཡོད་འདུག་ཅིང་། དེ་ཡང་དབྱར་དུས་སུ་འབྲོག་སྡེ་རུ་ཤོག་སོ་སོས་རུ་བསྐོར་ཆེ་ཆུང་སྣ་ཚོགས་བྱས་ཏེ་སྤང་ཐང་ཡུལ་ཁག་སོ་སོའི་ཁོངས་གཏོགས་ཀྱི་ས་མཚམས་སམ། འགའ་ཤས་ལ་རུ་ཤོག་སོ་སོར་སྒེར་དབང་གི་ས་མཚམས་ཡོད་འདུག་པ་ཙམ་ལས་མི་ཚང་སོ་སོར་སྒེར་དབང་གི་ས་ཆ་ཡོད་སྲོལ་མི་འདུག སྟོན་དུས་ནི་འབྲོག་མིའི་ཁ་དཔེར་སྟོན་འོ་ཕྱེད་མར་ཕྱེད་ཅེས་སུ་གྲགས་པ་བཞིན་འབྲོག་པ་ཚོས་ཤེ་གསོག་འཇོག་བྱེད་པའི་དུས་ཚིགས་ཁྱད་པར་ཅན་ཞིག་ཡིན་པར་བརྟེན།