ཆབ་ཆ་ས་ཁུལ་གྱི་མང་ཚོགས་ཚོགས་ཆེན་སྟེང་དུ་གནང་པའི་གསུང་བཤད།

མི་རིགས་ས་ཁོངས་རང་སྐྱོང་བྱེད་དགོས་ན། ཅིས་ཀྱང་མི་རིགས་དེའི་ཁྱད་ཆོས་སྲུང་འཛིན་བྱེད་དགོས། ༡༩༨༠།༧།༡།
མི་རིགས་ཟེར་བ་དེ་ནི་ལོ་རྒྱུས་ལས་བྱུར་བ་རེད། དཻ་ལ་རང་ཉིད་བྱུང་ཚུལ་དང༌། འཕེལ་ཚུལ། གནས་པ་ནས་འཇིག་པ་བཅས་གོ་རིམ་བརྒྱུད་དགོས། དེར་བརྟེན་མི་རིགས་ཀྱི་ཁྱད་ཆོས་སྲུང་འཛིན་བྱེད་རྒྱུར་ཁག་ཐེག་ཡོད་དགོས། ང་ཚོས་རང་འདྲར་བསྒྱུར་བའི་འདོད་ཚུལ་ཡོད་མི་རུང་བ། བོད་པ་ཡིན་ན་བོད་རིགས་དང་མཚུངས་དགོས་པ། རྒྱ་མི་ཡིན་ན་རྒྱ་རིགས་དང་མཚུངས་དགོས་པ། ཧུའི་རིགས་རྣམས་ཧུའི་རིགས་དང་མཚུངས་དགོས། ང་ཚོས་ཧུའི་རིགས་ཀྱིས་ཕག་ཤ་ཟ་བ་དར་སྤེལ་བྱེད་མི་རུང༌།

བོད་རིགས་བུད་མེད་ཀྱི་སྐྲ་བྲེག་པ་དར་སྤེལ་བྱེད་མི་རུང༌། རིག་གནས་གསར་བརྗེ་ཆེན་པོའི་ནང་བུད་མེད་ཀྱི་སྐྲ་བྲེག་ནས། རྒྱ་རིགས་དང་མི་བཚུངས་ཤིང་བོད་རིགས་ལའང་མི་མཚུངས་པས་གང་ལའང་མི་མཚུངས་པར་ གྱུར། ཁོ་མོ་ཚོས་བྲེག་པའི་སྐྲ་ཤད་མ་ཤེས་སྐབས། བཟོ་ལྟ་ཁྱད་པར་ཅན་ལ་གྱུར། འདི་ལ་གསར་བརྗེ་ཟེར་བ་མིན། གསར་བརྗེ་ཟེར་བ་དེ་ནི་སྤྱི་ཚོགས་རང་ལུགས་ཀྱི་ལམ་ལ་འགྲོ་བ་དང༌། ཏང་གི་བཀའ་ལ་ཉན་པ། མེས་རྒྱལ་གྱི་ཅན་བཞི་དང་འཛམ་གླིང་ཡོངས་ཀྱི་མིའི་རིགས་ཀྱི་བཅིངས་འགྲོལ་ལས་ དོན་ལ་ཞབས་འདེགས་ཞུ་རྒྱུ་དེ་རེད། སྐྲ་བྲེག་མི་བྲེག་དང་ཕག་ཤ་ཟ་མི་ཟ་ནི། གསར་བརྗེ་བྱེད་མི་བྱེད་པའི་གནད་དོན་མིན། ང་ཚོས་མི་རིགས་གཅིག་འདྲར་བསྒྱུར་བའི་གླེན་རྟགས་མ་སྟོན། མི་བཞི་ཚོགས་ཁག་དང་གཡོན་ཐལ་ཆེ་བའི་ལམ་ཕྱོགས་ལག་ལྟར་བྱེད་མཁན་གྱི་ཁ་ནས་སྤྱི་ ཚོགས་རང་ལུགས་སུ་སླེབས་ཟེར་ནས། མི་རིགས་ཟེར་བ་དེ་ཅི་ལ་ཡང་མི་བརྩི་བར། དོན་དངོས་ཐོག་འདི་ནི་ང་ཚོ་གྲངས་ཉུང་མི་རིགས་མེད་པར་གཏོང་བསམ་པ་རེད། མེད་པར་གཏོང་པའི་བྱེད་ཐབས་ནི། མི་རིགས་ཀྱི་སྐད་ཡིག་མི་སློབ་པ་དང་སློབ་ཏུ་མི་འཇིག་པ། ད་ལྟ་ངས་འདི་ཁུལ་གྱི་བོད་ཡིག་མཐོང་ཚེ་ཡིད་སེམས་སྐྱོ་བ་རེད། བོད་ལྗོངས་ཁུལ་ལ་སོང་ཡང༌། བོད་ཡིག་ཧ་ཅང་ཐར་ཐོར་རེད། བོད་ལྗོངས་ས་ཁུལ་ཡང་འདི་འདྲ་རེད། བོད་ལྗོངས་སུ་སྔོན་ཆད་བོད་ཡིག་བྲིས་པ་ཧ་ཅང་བཟང་མོད། ཡིན་ནའང་ད་ལྟ་བོད་ལྗོངས་སུ་བོད་ཡིག་ཡག་པོ་འབྲི་མཁན་བཙལ་ན་མི་རྙེད་པ་རེད། དེར་བརྟེན་མི་དམངས་འཐུས་མི་འཚོགས་སྐབས་སུ་ངས་བོད་ཡིག་གི་དབུགས་ཆད་ལ་ཁད་དམ། ཤི་ལ་ཁད་དུ་གྱུར་ཡོད་ཅེས་བཤད་ཡོད། ང་ཚོའི་རྒྱལ་ཁབ་ཏུ་རྒྱ་ཡིག་ལས་གཞན་བོད་ཡིག་ནི་ཅུང་ཙམ་ཆ་ཚང་བའི་ཡི་གེ་ཞིག་ ཡིན། ཡིནའང་ད་ལྟ་ཅིན་མིན་འདི་མིན་ཞིག་ཏུ་བཏང༌། ངོ་མ་བཤད་ན་བཅིངས་འགྲོལ་བྱས་ནས་ལོ་སུམ་ཅུ་འགོར་རུང་བོད་ཡིག་ཏུ་གཏམ་རྒྱུད་ རིང་པོ་གཅིག་ཀྱང་མེད། དེ་ནི་ངས་བོད་རང་གིས་བྲིས་པ་དང་གསར་དུ་བརྩམས་པའི་གཏམ་རྒྱུད་ལ་ཟེར། ཚང་མ་རྒྱ་ཡིག་ནས་བོད་ཡིག་ལ་བསྒྱུར་བ་ཡིན། འོ་ན་བོད་རིགས་ཁྲོད་དུ་གཏམ་རྒྱུད་འབྲི་མཁན་གཅིག་ཀྱང་མེད་པ་ཡིན་ནམ། དེ་མ་རེད། འབྲི་མཁན་ནི་ཡོད་པ་རེད། ཡིན་ནའང་ཁོས་མ་བྲིས་པ་རེད། དཻའི་རྒྱུ་མཚན་ནི་ཞིབ་བཤེར་ཡང་ནས་ཡང་དུ་བྱས་རྗེས་ཚང་མ་མནམ་པ་ཡིན་པས། མི་ཚོས་ཅི་ཞིག་ལ་དཔེ་དེབ་འབྲི་དགོས་སམ། དཔེ་དེབ་གཅིག་འབྲི་རྒྱུ་ནི་དེ་སླ་བའི་དོན་ཞིག་མ་རེད། ཁོས་བྲིས་ཀྱང་གཞན་གྱིས་དཔར་དུ་མི་བསྐྲུན་པ་ལས། སྟབས་མ་ལེགས་ན་ཁྱོད་ཀྱི་དཔེ་དེབ་ནང་དུ་དུག་ཡོད་པ་དང༌། མི་རིགས་ཁ་བྲལ་གྱི་གནད་དོན་ཡོད། ཆོས་ལུགས་ཀྱི་དུག་རྒྱུན་ཡོད་སོགས་བཤད་ནས་མགོར་ཞ་མོ་ཞིག་བསྐོན་ན་ཅི་ཞིག་བྱ། དེར་བརྟེན། མི་ཚོས་མ་བྲིས་པ་རེད། སློབ་ཁྲིད་ཀྱི་ཐད། སློབ་ཆུང་ནང་རྒྱ་ཡིག་ཁྲིད། ལོ་གཅིག་ལ་འདི་ལྟར་ཡིན་པ་དང༌། ལོ་གཉིས་ལ་འདི་ལྟར་ཡིན། ལོ་གསུམ་ལའང་འདི་ལྟར་ཡིན་སྟབས། ཁྲིད་ནས་ཅི་ཡང་མ་ཤེས་པས་སློབ་སྦྱོངས་རྩ་བ་ནས་མ་བྱས་པ་དང་ཁྱད་པར་མེད། དེའི་ཕྱིར་ཡིག་རྨོང་པ་ད་དུང་དེ་འདྲ་མང་པ་རེད། བོད་ལྗོངས་སུ་སྔོན་ཆད་བོད་ཡིག་ཤེས་པའི་མི་ཅུང་ཙམ་མང༌། ཡིན་ན་ཡང་བྱ་བ་སྒྲུབ་པ། བཟོ་བ་བསྡུ་ལེན། སློབ་མ་བསྡུ་ལེན། ལས་བྱེད་པར་རྒྱུགས་ལེན་པ་བཅས་ཚང་མ་རྒྱ་ཡིག་སྤྱད་པས། བོད་ཡིག་ཧ་ཅང་བཟང་བའི་མི་ཡང་ཡིག་རྨོངས་སུ་བརྩིས་པ་རེད། དེ་ནི་བོད་རང་སྐྱོང་ཁུལ་ལས་ཅུང་ཙམ་མཐོ་བ། བོད་ཡིག་ཡི་གེ་ཞིག་ལ་མི་བརྩི་བ་ནི་ཅི་འདྲ་རྩིས་མེད་དུ་བཏང་བ་དང༌། མི་རིགས་ཀྱི་ཁེ་དབང་ལ་ཅི་འདྲ་རྩིས་མེད་དུ་བཏང་བ་ཡིན་པ་རེད་ཨང༌། ཡིག་བྱང་ཐོག་ཏུ་ཚང་མ་རྒྱ་ཡིག་བྲིས་པ་དང༌། བོད་ཡིག་བྲིས་ཀྱང་འདི་འདྲ་ཆུང་བ་དང༌། རྒྱ་ཡིག་འདི་འདྲ་ཆེ་བ། ཡིག་བྱང་ལ་ལའི་ཐོག་ཏུ་བོད་ཡིག་རྩ་བ་ནས་བྲིས་མེད་པ་རེད། ན་ནིང་བོད་ལྗོངས་གླུ་གར་ཚོགས་པ་རོ་ཡོབ་ཀྱི་རྒྱལ་ཁབ་འགའ་ལ་འཁྲབ་སྟོན་བྱེད་ དུ་སོང༌། འཁྲབ་པའི་ཟློས་གར་བོད་ཀྱི་ཟློས་གར་ཡིན་མོད། བཤད་པའི་སྐད་ཆ་ནི་རྒྱ་སྐད་ཡིན་སྟབས། ཕྱི་རྒྱལ་གྱི་མིས་ཁྱོད་ཚོ་ནི་བོད་ལྗོང་འཐུས་མི་ཚོགས་པ་ཡིན་པས། བོད་སྐད་བཤད་ཤེས་སམ་མི་ཤེས་ཞེས་དྲིས། མི་ཤེས་ཞེས་ལན་བཏབ་རྗེས། ཚང་མ་བགད་པ་རེད། དེ་གསར་འགྱུར་སྟེང་དུ་ཡང་བཀོད་ཡོད། མི་རིགས་ས་གནས་རང་སྐྱོང་བྱེད་དགོས་ན། ཅིས་ཀྱང་མི་རིགས་དེའི་ཁྱད་ཆོས་སྲུང་འཛིན་བྱེད་དགོས། ཁྱད་ཆོས་མེད་ན་སྤྱི་མཚན་མེད། འདི་ནི་རྩོད་སྒྲུབ་ཡིན། དེར་རྟེན། ང་ཚོས་མི་རིགས་གཅིག་འདྲར་འགྱུར་བ་སྒྲུབ་མི་རུང༌། ལོ་བརྒྱ་ཕྲག་འགའ་དང༌། ལོ་སྟོང་ཕྲག་འགའི་རྗེས་སུ་འཕེལ་ཚུལ་ཅི་འདྲ་ཡིན་པ། ང་ཚོས་བསམ་མི་དགོས་པ་རེད། མི་རིགས་གཅིག་འདྲར་འགྱུར་བ་བྱ་རྒྱུ་ནི་མི་རིགས་མེད་པར་གཏོང་བའི་སྲིད་ཇུས་ ཡིན་པས། དེ་ལ་ངོ་རྒོལ་བྱེད་དགོས་པ་མ་གཏོགས། ཁས་ལེན་མི་རུང༌། འདི་ནི་ཕྱོགས་གཅིག་ཡིན། ཕྱོགས་གཞན་གཅིག་ནི། མི་རིགས་སོ་སོའི་བར་མཐུན་སྒྲིལ་བྱེད་དགོས་པ་དང༌། མི་རིགས་ཕན་ཚུན་བར་འདྲ་མཉམ་ཡིན། མི་རིགས་བར་མཐུན་སྒྲིལ་བྱེད་དགོས་ན་ཆ་རྐྱེན་ཡོད་དགོས། ཆ་རྐྱེན་མེད་པའི་དོན་བྱ་གཅིག་ཀྱང་མེད། ཆ་རྐྱེན་མེད་ཟེར་བ་ནི་ཚན་རིག་དང་མི་མཐུན། འཛམ་གླིང་ཐོག་ཏུ་ཆ་རྐྱེན་མེད་པའི་དོན་བྱ་གཅིག་ཀྱང་མེད། མིའི་རིགས་གནས་པའང་རང་ལ་མཐུན་པའི་ཆ་རྐྱེན་ཡོད། འཇིག་རྟེན་འདི་བར་སྣང་ནས་མར་མི་ལྷུང་བ་ཡང་ཆ་རྐྱེན་ཡོད་པ་རེད། དེ་ཚོ་ནི་ཕན་ཚུན་འཐེན་པ་དང༌། ཕན་ཚུན་གཅུན་པའི་ཕྱིར་ཡིན། འདི་དག་ཚང་མ་ཆ་རྐྱེན་ཡིན། མི་རིགས་མཐུན་སྒྲིལ་བྱེད་པར་ཡང་ཆ་རྐྱེན་ཡོད། དེའང་ཕན་ཚུན་གཅུན་པ་དང༌། ཕན་ཚུན་བརྟེན་ནས་གནས་པ་ཡིན། ༦གྲངས་ཉུང་མི་རིགས་ཀྱིས་རྒྱ་རིགས་ལ་བརྩི་བཀུར་བྱེད་དགོས། ཁོ་ཚོ་ང་ཚོའི་རྒྱལ་ཁབ་ཀྱི་མི་རིགས་གཙོ་བོ་ཡིན། ཁོ་ཚོ་ནི་སྔོན་ཐོན་ཡིན་པས། ང་ཚོས་ཁོ་ཚོ་ནི་ཕུ་བོར་བརྩི་དགོས་ཤིང་ཡིན་ནའང་དེས་ཀྱང་ནུ་བོ་ལ་ཤ་ཚ་དགོས་པ་ ལས་ནུ་བོར་རྡུང་མི་ཉན། ཚང་མར་རང་ཉིད་ཀྱི་ཡུལ་ཡོད་ཅིང༌། ཕུ་བོ་ཡོད་ལ་ནུ་བོ་ཡང་ཡོད། ཕུ་བོས་ཀྱང་ནུ་བོ་ཆུང་ཆུང་ལ་ཤ་ཚ་དགོས། འདི་ལྟར་བྱས་ན་ཁྱིམ་འདི་ནི་མཐུན་པོ་ཡིན་པ་རེད། ཕུ་བོ་རྒན་པས་རྒྱུན་དུ་ནུ་བོ་ཆུང་ཆུང་ལ་རྡུང་ན། ནུ་བོ་ཆུང་ཆུང་དྲ་མའི་ནང་ནས་བྲོས་ངེས་ཡིན། འདི་ནི་ཡ་མཚན་གྱི་དོན་ཞིག་མ་རེད། ཁ་བྲལ་འགྲོ་བར་སྐྲག་པ་ནི་འགྲིག་པ་ཡིན་པ་དང༌། ང་ཚོ་ཁ་བྲལ་མི་ཉན། ང་ཚོ་ཡང་གཏན་ནས་ཁ་བྲལ་རྒྱུ་མིན། ང་ཚོ་མི་རིགས་བར་མཐུན་སྒྲིལ་བྱས་ནས། ཐུན་མོང་གི་ང་ཚོའི་མེས་རྒྱལ་འཛུགས་སྐྲུན་བྱེད་དགོས། ཡིན་ནའང་ཁ་བྲལ་ལ་སྐྲག་ནས་བསྡད་ནའང་ཁ་བྲལ་བའི་རྒྱུ་རྐྱེན་གནས་ཡོད། ༧དཔེ་ཞིག་བཞག་ན། བཟའ་ཚང་ཞིག་ཡོད་པ་དེ་གཉིས་འཐོར་རྒྱུ་ཡིན། འཐོར་ན་བཟང་ངམ་མི་བཟང་ཞེ་ན། དེ་ནི་མི་བཟང་བ་རེད། བདེ་སྐྱིད་ལྡན་པའི་ཁྱིམ་ཞིག་འཛུགས་དགོས་ན་བཟའ་ཚང་བར་ཕན་ཚུན་ལ་བརྩི་འཇོག་ དང༌། ཕན་ཚུན་ལ་དགའ་ཞེན་བྱེད་དགོས་ལ། མི་གཞན་པས་ཕྲ་མ་དཀྲུགས་ཤིང་ཅི་འདྲ་བསླབས་ཀྱང་འཟའ་ཚང་འཐོར་མི་ཐུབ་པ་རེད། གལ་ཏེ་དེ་འདྲ་ཞིག་མ་བྱས་ཏེ་ཕན་ཚུན་འཁོན་འཛིན་བྱེད་པ་དང༌། ཕན་ཚུན་བརྩི་འཇོག་མི་བྱེད་ན། མི་ཚོས་ཇི་ལྟར་བཤད་ཀྱང་བཟའ་ཚང་འཐོར་རྒྱུ་ནི་གཡོལ་ཐབས་མེད་པ་རེད། འདི་ནི་དཔེ་ཞིག་ཡིན། དེར་བརྟེན་ང་ཚོས་མི་རིགས་མཐུན་སྒྲིལ་ལེགས་སྒྲུབ་བྱེད་དགོས་པ་དང༌། མེས་རྒྱལ་གྱི་གཅིག་གྱུར་ལ་སྲུང་སྐྱོབ་བྱེད་དགོས། མི་རིགས་སོ་སོ་ཁ་བྲལ་མི་བྱེད་པར་ཚང་མ་མཉམ་གནས་བྱེད་དགོས། འདི་ནི་ངཚོ་ཐུན་མོང་གི་ཁེ་ཕན་ཡིན་ལ། མི་རིགས་སོ་སོའི་རྩ་བའི་ཁེ་ཕན་ཡང་ཡིན། ང་ཚོས་རང་ཉིད་ཀྱི་ཚེ་སྲོག་བློས་བཏང་ནས་ང་ཚོའི་མེས་རྒྱལ་སྲུང་སྐྱོབ་བྱེད་ དགོས་པ་དང༌། མེས་རྒྱལ་གྱི་གཅིག་གྱུར་ལ་སྲུང་སྐྱོབ་དགོས། རང་ཉིད་ཀྱི་མིག་འབྲས་སྲུང་བ་ལྟར་མི་རིགས་སོ་སོའི་མཐུན་སྒྲིལ་ཆེན་མོ་དང་མཉམ་ འབྲེལ་ཆེན་མོར་སྲུང་སྐྱོབ་བྱེད་དགོས། འདི་ནི་ཧ་ཅང་ཡོངས་ཁྱབ་ཡིན་པའི་བདེན་དོན་ཞིག་ཡིན། ༨འོན་ཀྱང་༡༩༥༨ལོ་དང་རིག་གནས་གསར་བརྗེ་ཆེན་པོའི་སྐབས་ཀྱི་བྱེད་སྟངས་དེ་དག་ ནི་ནོར་འཁྲུར་ཡིན། སྤྱོད་ཚུལ་དེ་དག་གིས་ཁ་བྲལ་ངན་སྐུལ་བྱས་པ་མ་གཏོགས། གསར་བརྗེ་ལ་ཕན་པ་མེད་པ་དང༌། མེས་རྒྱལ་གྱི་གཅིག་གྱུར་སྲུང་སྐྱོབ་བྱེད་པར་ཕན་པ་མེད། ༡༩༥༨ལོར་བོད་རིགས་ལ་དེ་འདྲ་བརྒྱབ་པ་དེ། ཁོ་ཚོས་བཤད་ན་བོད་རང་བཙན་ཟེར་བ་དེསྔོན་འགོག་དང༌། ཁ་བྲལ་འབྱུང་བར་དོགས་ནས་ད་གཟོད་བྱས་པ་ཡིན་ཞེས་བཤད་པ་རེད། དོན་དངོས་ཐོག་ཏུ་མི་དེ་ཚོ་བཙན་གྱིས་ལམ་དེར་འགྲོ་རུ་བཅུག་པ་ཡིན། འཛེམ་ཆ་མེད་པའི་སྒོ་ནས་བཤད་ན། ༡༩༥༨ ལོར་ཟིང་འཁྲུག་ཞི་འཇགས་ནང་དྲག་གནོན་རྒྱ་སྐྱེད་ཆེ་དྲགས་པ་རེད། བཤད་ཚུལ་ལ་མེས་རྒྱལ་གྱི་གཅིག་གྱུར་ལ་སྲུང་སྐྱོང་བྱས་པ་ཡིན་ཞེས་བཤད་པ་རེད། དོན་དངོས་སུ་མེས་རྒྱལ་གྱི་གཅིག་གྱུར་ཁ་བྲལ་དུ་བཏང་བ་རེད། ཧྲུའུ་ཅི་སྐུ་ཞབས། ཁྱེད་ཀྱི་སེམས་ལ་གཅིག་གྱུར་སྲུང་སྐྱོང་བྱེད་རྒྱུ་ཡིན་ཞེས་སྙམ་ན་ཡང༌། སྒྲུབ་པ་ནི་ཁ་བྲལ་གྱི་བྱ་བ་ཡིན། སྐབས་དེའི་འགོ་ཁྲིད་དེ་དག་ནི། བློ་མཐུན་མིན་ཞིང་སྐུ་ཞབས་ཡིན། མི་དེ་འདྲ་མང་པོ་བཟུང་བ་དང༌། མི་དེ་འདྲ་མང་པོ་ བསད་པ་རེད། དེར་བརྟེན་མི་རིགས་མཐུན་སྒྲིལ་བྱ་རྒྱུར། མི་རིགས་ཚང་མར་འགན་ཁུར་ཡོད་པ་རེད། བོད་རིགས་ནང་གི་མི་ཁ་ཤས་དང་ཁྱད་པར་དུ་བོད་ལྗོངས་སུ་རྒྱ་མི་ཟུར་འབུད་བྱེད་ པའི་བསམ་པར་ངས་ངོ་རྒོལ་བྱེད་པ་ཡིན། རྒྱ་རིགས་ནི་རང་རྒྱལ་གྱི་མི་རིགས་སོ་སོའི་ནང་གི་མི་རིགས་གཙོ་བོ་ཞིག་དང་ གྲུབ་ཆ་གཙོ་བོ་ཞིག་ཡིན་པས་ང་ཚོས་རྒྱ་རིགས་ཟུར་འབུད་བྱེད་མི་རུ། དུས་མཚུངས་སུ་རྒྱ་རིགས་བློ་མཐུན་ཚོས་ཀྱང་གྲངས་ཉུང་མི་རིགས་ལ་རྒྱུན་དུ་མགོ་ གནོན་བྱས་མི་ཆོག རྒྱ་རིགས་བློ་མཐུན་ཁ་ཤས་ཀྱང་ཧ་ཅང་མི་བཟང༌། ཁོ་ཚོས་ཁྱོད་ཚོ་རྗེས་ལུས་ཡིན་པ་དང་ཁྱོད་ཚོ་གང་འདྲ་དེ་འདྲ་རེད་ཅེས་བཤད་པ་ རེད། རྗེས་ལུས་ཡིན་པ་ནི་ལོ་རྒྱུས་ཀྱི་བཟོས་པ་ཡིན། འོ་ན་ང་ཚོ་རྨོངས་པ་རེད་དམ། མ་རེད། སློབ་གསོ་བཏང་བ་བཟང་ཞིང༌། སློབ་གྲྭ་མང་བ་ཡོད་ན། ང་ཚོའི་ནང་དུ་ཡང་མི་རིགས་གཞན་དང་མཚུངས་པའི་ཚན་རིག་པ་ཐོན་སྲིད་པ་རེད། ང་ཚོས་སློབ་སྦྱོང་བཟང་པོ་བྱེད་མ་ཐུབ་པ་རེད། སློབ་སྦྱོང་བཟང་པོ་བྱ་ན། སློབ་གྲྭ་རུ་གཞན་དང་འདྲ་བར་ཤེས་ལྡན་མི་སྣ་སྐྱེད་སྲིང་བྱེད་ཐུབ་པ་རེད། ང་ཚོ་གྲངས་ཉུང་མི་རིགས་རྨོངས་པ་མ་རེད། ང་ཚོ་ནི་ལས་ལ་བརྩོན་ཞིང་དཔའ་སེམས་ཆེ་བ་དང་བློ་གྲོས་ལྡན་པའི་མི་རིགས་ཤིག་ ཡིན། དེར་བརྟེན་ང་ཚོར་སྣང་མེད་མཐོང་ཆུང་མ་བྱེད་ཅིག བོད་རྒན་བོད་རྒན་ཞེས་མ་ཟེར། ང་ཚོས་རྒྱ་རྒན་རྒྱ་རྒན་མ་ཟེར། དེ་འདྲ་བཤད་ན་མི་བཟང་བ་རེད། ཚང་མ་མེས་རྒྱལ་གྱི་སྤུན་ཟླ་ཡིན་པས། དེ་འདྲ་བཤད་ན་ཧ་ཅང་མི་བཟང༌། སྔོན་ཐོན་ཅི་ཙམ་ཡིན་ན་རྗེས་ལུས་པར་རོགས་རམ་དེ་ཙམ་བྱེད་པའི་ལོས་འགན་ཡོད་པ་ དང༌། ཁོ་ཚོ་ཡར་ལ་ལག་འཐེན་བྱེད་དགོས་པ་ལས་ཁོ་ཚོར་མཐོང་ཆུང་དང་མགོ་གནོན་བྱེད་པའི་ དབང་ཆ་མེད། མི་རིགས་སོ་སོའི་བར་ཕན་ཚུན་མཐུན་སྒྲིལ་བྱེད་པ་དང་མི་རིགས་ལས་བྱེད་པ་སྐྱེད་ སྲིང་བྱེད་རྒྱུ་ནི་ཧ་ཅང་གལ་ཆེ་བ་རེད། བཅིངས་འགྲོལ་བྱས་པའི་ཚུན་ལ། ང་ཚོས་གྲངས་ཉུང་མི་རིགས་ཀྱི་ལས་བྱེད་པ་མི་ཉུང་བ་ཞིག་སྐྱེད་སྲིང་བྱས། མི་རིགས་ལས་བྱེད་པ་དེ་ཚོའི་ནང་དུ་ཆེས་མང་ཆེ་བ་ནི་བཟང་བ་རེད། ཕྱོགས་གཅིག་ནས་ཁོ་ཚོས་ཏང་གི་མགོ་ཁྲིད་ལ་བརྩི་བཀུར་བྱེད་པ་དང༌། མར་ལེ་རིང་ལུགས་ལ་དད་གུས་བྱེད་པ། སྤྱི་ཚོགས་རིང་ལུགས་ཀྱི་འགྲོ་ལམ་དུ་འགྲོ་བ་རེད། ཕྱོགས་གཞན་ཞིག་ནས་ཁོ་ཚོ་རང་གི་མི་རིགས་ལ་བརྩེ་དུང་ཟབ་མོ་ཡོད་པས། མི་དེ་དག་ནི་ང་ཚོ་བོད་རིགས་ཀྱི་རིན་པོ་ཆེ་ཡིན། ཁོང་ཚོ་ཚང་མ་བློ་མཐུན་བཟང་པོ་ཡིན་པས། ང་ཚོས་ངེས་པར་དུ་བློ་མཐུན་འདི་དག་ལ་སློབ་སྦྱོང་བྱེད་དགོས། ཁོ་ཚོ་ནི་ང་ཚོའི་མི་རིགས་ཀྱི་གཟི་བརྗིད་དང་ང་རྒྱལ་ཡིན། ཡིན་ན་ཡང་མི་རིགས་ལས་བྱེད་པ་ལ་ལ་ཡང་དེ་འདྲ་བཟང་པོ་ཞིག་མ་རེད། མི་ལ་ལས་གོ་གནས་འཕར་བའི་ཆེད། གཡོན་ཐལ་ཆེ་བའི་ལམ་ཕྱོགས་ཀྱི་སྐབས་སུ་མི་རིགས་ཀྱི་བརྩེ་དུང་དོར་བ་དང༌། མི་རིགས་ཀྱི་དབྱེ་མཚམས་ལས་བརྒལ་བ་རེད། མི་རིགས་ལས་བྱེད་པ་ལ་ལས་རང་གི་མི་རིགས་ཀྱི་མང་ཚོགས་ལ་བཟུང་བའི་སྤྱོད་ཚུལ་ དེ་རྒྱ་རིགས་ལ་བཟུང་བའི་སྤྱོད་ཚུལ་ལསབཙན་པ་དང་རྩུབ་པ་རེད། ཁོ་ཚོ་ལ་ཡང་བྱ་ཐབས་མེད། སྐབས་དེར་སུས་རང་གི་མི་རིགས་མང་ཚོགས་ཀྱི་ཆེད་དུ་སྐད་ཆ་ཚིག་གཅིག་བཤད་ན། མྱུར་དུ་ས་གནས་མི་རིགས་རང་ལུགས་ཀྱི་ཞ་མོ་བསྐོན་སྟབས། ང་ཚོ་སྐྲག་པ་རེད། དེ་ང་ཚོས་ཤེས་པ་རེད། ཕྱིན་ཆད་བློ་མཐུན་དེ་དག་ལ་རོགས་རམ་བཟང་པོ་བྱེད་པ་དང༌། ཁོ་ཚོར་དེ་འདྲ་བྱས་ན་མི་འགྲིགས་པ་དང༌། ཏང་གི་ཁེ་ཕན་ལ་མི་མཐུན་པ་དང་མི་དམངས་ཀྱི་ཁེ་ཕན་ལ་མི་མཐུན་པར་མ་ཟད། མི་དམངས་ཀྱིས་ཀྱང་དགའ་བསུ་མི་བྱེད་པ་གསལ་བཤད་བྱད་དགོས། ངེས་པར་དུ་ཕྱོགས་གཅིག་ནས་ཏང་གི་གསུང་ལ་ཉན་པ་དང༌། ཏང་གི་མགོ་ཁྲིད་ལ་བརྩི་སྲུང་བྱས་ནས། སྤྱི་ཚོགས་རིང་ལུགས་ཀྱི་ལམ་ལ་འགྲོ་དགོས། ཕྱོགས་གཞན་གཅིག་ཏུ་མི་རིགས་ཀྱི་བརྩེ་དུང་དང་ཁྱད་ཆོས་རྒྱུན་སྲུང་བྱེད་དགོས་ པ་དང༌། རང་གི་མི་རིགས་ཀྱི་རྒྱ་ཆེའི་མང་ཚོགས་ཀྱི་ཁེ་ཕན་མཚོན་དགོས། འདི་ལྟར་བྱས་ན་ད་གཟོད་ཏང་དང་མི་དམངས་བར་གྱི་ཟམ་པའི་ནུས་པ་འདོན་ཐུབ་པ་དང་རང་ གི་མི་རིགས་ཀྱི་མང་ཚོགས་རྣམས་ཀྱིས་ཀྱང་ཁྱོད་ལ་ཡིད་ཆེས་བྱེད་པ་དང༌། ཁྱེད་ནི་རང་གི་མི་རིགས་ཀྱི་ལས་བྱེད་པ་དང་རང་གི་མི་རིགས་སྣེ་ཁྲིད་མཁན་ཡིན་པ་ ཁས་ལེན་བྱེད་པ་རེད། མི་རིགས་ལས་བྱེད་པ་དེར་རང་གི་མི་རིགས་དང་རང་གི་ས་ཁུལ་དུ་མཚན་སྙན་གྲགས་ཡོད་ དགོས་པ་ཡིན། ལས་བྱེད་པར་མཚན་སྙན་གྲགས་མེད་ན་ཕན་ཐོགས་མེད་པ་རེད། ངས་འཛེམས་ཆ་མེད་པར་བཤད་ན། མི་རིགས་ལས་བྱེད་པ་ལ་ལར་མང་ཚོགས་ཀྱིས་མི་དེ་ཚོ་ནི་ང་ཚོའི་མི་རིགས་ཀྱི་བློ་ ལོག་པ་ཡིན་ཟེར། མི་ཉུང་ཤས་ཤིག་གིས་མི་རིགས་ཁེ་ཕན་ལ་ངོ་ལོག་རྒྱབ་གཏོད་བྱས། མི་དེ་ལྟ་བུ་མང་པོ་མེད། མི་དེ་ལྟ་བུས་ཏང་ལ་ནུས་པ་ཅི་ཞིག་ཐོན་ཐུབ་ཟེར་ན། ནུས་པ་ངན་པ་མ་གཏོགས་ཐོན་མི་ཐུབ་པ་རེད། བློ་མཐུན་དེ་ཚོར་སློབ་གསོ་གཏོང་དགོས། ཁོ་ཚོར་སློབ་གསོ་བཏང་སྟེ་ཕྱོགས་གཉིས་ཀར་བལྟ་རྟོགས་བྱས་ན་ད་གཟོདལས་བྱེད་པ་ ཕུལ་བྱུང་ཅན་དུ་འགྱུར་ཐུབ་པ་དང༌། ཏང་དང་མི་དམངས་ཀྱི་ལས་དོན་ལ་ཕན་པ་ཡོད་པའི་མི་ཞིག་ཏུ་འགྱུར་ཐུབ་པ་རེད། དེའི་ཕྱིར། མི་རིགས་ལས་བྱེད་པ་སྐྱེད་སྲིང་བྱེད་པའི་བྱ་བ་ནི་ཤིན་ཏུལ་གལ་ཆེ་བ་ཡིན། འདི་ནི་ང་རང་གི་ལྟ་ཚུལ་ཡིན། ངེས་པར་དུ་སྤྱི་ཚོགས་རིང་ལུགས་ཀྱི་འགྲོ་ལམ་དང་མེས་རྒྱལ་གཅིག་གྱུར་རྒྱུན་ འཁྱོངས་བྱེད་ཐུབ་ལ། རང་གི་མི་རིགས་ཀྱི་མང་ཚོགས་ལ་ཡང་འབྲེལ་འདྲིས་དམ་པོ་བྱེད་ཐུབ་པའི་མི་འདམ་ གསེས་བྱ་རྒྱུ་དོ་སྣང་བྱེད་དགོས། འདི་ནི་བློ་མཐུན་ཅང་ཕིན་གྱིས་མི་རིགས་དོན་གཅོད་ཨུ་ཡོན་ལྷན་ཁང་གི་རྒྱས་ འཛོམས་གྲོས་ཚོགས་ཏོག་གི་སྙན་ཞུའི་ནང་གུ་གསུང་པ་ཡིན། ཕྱིན་ཆད་མི་རིགས་ལས་བྱེད་པ་འདམ་གསེས་བྱས་ན་འདི་འདྲའི་རྩ་དོན་རྒྱུན་འཁྱོངས་ བྱེད་དགོས། གསལ་པོར་བཤད་ན། ཕྱོགས་གཉིས་ལ་བལྟ་རྟོགས་བྱེད་དགོས་པ་ལས། ཕྱོགས་གཅིག་ཁོ་ནར་བལྟ་རྟོགས་བྱེད་མི་རུང་བ་དེ་ཡིན། དེ་ནི་ཧ་ཅང་གལ་ཆེ་བ་རེད། གཡོན་ཐལ་ཆེ་བའི་ལམ་ཕྱོགས་ཀྱི་ཤུགས་རྐྱེན་ཐེབས་པའི་འོག་གྲངས་ཉུང་མི་རིགས་ ཀྱི་ལས་བྱེད་པ་ལ་ལས་ཕྱོགས་གཅིག་ཁོ་ནར་མ་གཏོགས་བལྟ་རྟོགས་མི་བྱེད་པ་རེད། དེ་ནི་མི་འགྲིག་པ་རེད། བློ་མཐུན་དེ་ཚོའི་ནང་དུ་ལ་ལ་ནི་ཁོ་ཚོ་རང་ཉིད་མི་འགྲིག་པ་རེད། ལ་ལར་ལམ་ཕྱོགས་ཀྱི་ཤུགས་རྐྱེན་ཐེབས་པ་ཡིན་པས། ཚང་མ་ཁོ་རང་ཉིད་ཀྱི་མགོ་ལ་འཇོག་མི་རུང༌། ང་ཚོས་ཁོ་ཚོར་ཤིན་ཏུ་བཟང་ཞིང་སྤྲོ་སེམས་འཁོལ་བའི་ངང་ནས་རོགས་རམ་བྱས་ཏེ། ཕྱིན་ཆད་ངེས་པར་དུ་ཕྱོགས་གཉིས་ལ་བལྟ་རྟོགས་བྱེད་དགོས། ཕྱོགས་གཉིས་ལ་བལྟ་རྟོགས་བྱས་ན་བཟང་བ་རེད། ཕྱོགས་གཞན་ཞིག་ཏུ། རང་སྐྱོང་ཁུལ་སོ་སོའི་མི་རིགས་ལས་བྱེད་པར་ཡང་བསྡུར་ཚད་དེ་ངེས་པར་དུ་རིམ་ བཞིན་འཕར་དགོས། འོན་ཀྱང་རྒྱ་རིགས་ལས་བྱེད་པ་ཡང་ཟུར་འབུད་བྱེད་མི་རུང༌། ངས་ན་གནས་སོ་སོའི་མི་རིགས་ལས་བྱེད་པ་དང་རྒྱ་རིགས་ལས་བྱེད་པས་འབྲེལ་བ་བཟང་ པོ་བྱེད་པ་དང་ཚང་མས་ལག་གདང་སྦྲེལ་ནས་མཉམ་དུ་ཏང་དང་མི་དམངས་ཀྱིས་ཁྱོད་ཚོར་ སྤྲད་པའི་ལས་འགན་ལེགས་སྒྲུབ་བྱེད་རྒྱུའི་རེ་འདུན་ཞུས་པ་ཡིན། མི་རིགས་ལས་བྱེད་པའི་རབ་དུའང་སྐབས་འགར་དེ་འདྲ་མཐུན་སྒྲིལ་ཡོང་བ་ཞིག་མ་རེད། དེ་འདྲ་བྱས་ན་མི་འགྲིག ཚང་མ་མཐུན་སྒྲིལ་ཡོང་དགོས། མཐུན་སྒྲིལ་མི་ཡོང་བ་དེ་ནི་རིག་གནས་གསར་བརྗེ་ཆེན་པོའི་ནང་ནས་བྱུང་བ་རེད། རིག་གནས་གསར་བརྗེ་ཆེན་པོས་ང་ཚོར་བཞག་པའི་དུག་ཅིག་རེད། སྐབས་དེར་ཕྱོགས་ཁག་སྒྲིག་པས། ཐ་ན་བཟའ་ཚང་བར་དུའང་གནད་དོན་བྱུང༌། གནད་དོན་དེ་རིགས་ལས་ཁུངས་ནང་དུའང་ཡོད། ཕན་ཚུན་མཚང་འབྱིན་བྱེད་པ་དང༌། ཕན་ཚུན་ཞུ་ཡིག་ཆུང་ཆུང་བྲིས། མི་ལ་ལས་མི་བཤད་དགུ་བཤད་དང༌། སྡིག་མོ་བྱས་ནས་མི་ཤི་ཁྱིམ་སྟོངས་སུ་གྱུར་སྟབས། མི་མང་པོ་ཞིག་གི་སེམས་ནང་དུ་སྡུག་བཞག་པས། འབྲེལ་བའི་སྟེང་དུའང་དེ་འདྲ་རྒྱུན་གཏན་ཞིག་མ་རེད། སྔོན་ཆད་ཀྱི་དོན་དག་ཆུངཆུང་དེ་དག་གིས་ད་ལྟའི་འབྲེལ་བར་གནོད་མི་བསྐྱལ་བའི་ རེ་འདུན་ཞུ། ངས་རང་གི་བྱ་བ་སླར་གསོ་བྱས་པའི་རྗེས་སུ་ང་ལ་འཐབ་རྩོད་བྱས་མྱོང་བའི་མི་རྣམས་ རྩད་གཅོད་གཏན་ནས་བྱས་མ་མྱོང༌། ངས་སྔོན་ཆད་བཤད་མ་མྱོང་ལ། ཕྱིན་ཆད་ཀྱང་མི་བཤད། ད་ལྟ་ངའི་བྱ་བ་སླར་གསོ་བྱས་ཡོད་པ་རེད། གལ་ཏེ་རྩད་གཅོད་བྱས་ན་ཆ་རྐྱེན་ལྡན་པ་རེད། འོན་ཀྱང་ངས་རྩད་གཅོད་བྱེད་མི་འདོད། དེར་དོན་སྙིང་མེད་པ་རེད། ཁོ་ཚོས་བཤད་འདོད་ན་བཤད་དུ་བཅུག་ཁོ་ཚོ་རང་གིས་རང་ལ་ཚིག་བཀྱོན་བྱེད་དུ་བཅུག ཁོ་ཚོས་ང་ལ་གཅར་རྡུང་བྱས་མྱོང༌། ད་ལྟ་ང་ལ་ན་ཟུག་མི་སྐྱེ་ལ། ད་ལྟ་ཁོ་ཚོས་ང་ལ་གཅར་རྡུང་ཡང་བྱེད་མི་ཕོད་པ་རེད། རང་ཉིད་ཀྱི་དོན་ཆུང་ཆུང་དེ་དག་སེམས་ལ་མ་འཛིན་དང༌། དོན་ཆུང་དེ་དག་སེམས་ལ་བཟུང་ན། མིའི་སྤྱོད་ཚུལ་ཉམས་པ་རེད། འདི་ནི་ཉམས་མྱོང་ཡིན། རང་ཉིད་ཀྱི་དོན་ཆུང་དེ་དག་སེམས་ལ་མི་འཛིན་པར་བློ་ཡངས་ཁོག་ཆེ་བྱེད་དགོས། འདི་ལྟར་བྱས་ན་མི་ལ་སྤྱོད་ཚུལ་ལྡན་པ་དང་མཐུན་སྒྲིལ་ལ་ཡར་སྐུལ་ཐོབ་ཐུབ། བྱ་བ་སྒྲུབ་པར་ཕན་པ་ཡོད། དེ་མིན་སྔོན་ཆད་ལྟར་མཚང་འབྱིན་བྱས་པས། སེམས་ནང་དུ་འགལ་ཆ་བྱུང་བ་དང༌། རྒྱུན་པར་འདང་མ་ཕོག དེ་འདྲ་བྱས་ན་དོན་སྙིང་ཅི་ཡང་མེད། དོན་དག་འདི་འདྲ་མ་སློང༌། འགོ་ཁྲིད་ཚན་ཆུང་མཐུན་སྒྲིལ་ཡོང་དགོས། འགོ་ཁྲིད་ཚན་ཆུང་ནང་གི་མི་རིགས་ལས་བྱེད་པ་མཐུན་སྒྲིལ་ཡོང་དགོས། ལས་བྱེད་པ་གསར་རྙིང་བར་མཐུན་སྒྲིལ་ཡོང་དགོས། འདི་ལྟར་བྱས་ན་ཧ་ཅང་བཟང་བ་རེད། ཕྱོགས་གཞན་གཅིག་ཏུ་རང་གི་མི་རིགས་ཀྱི་ལས་བྱེད་པ་འབོར་ཆེན་སྐྱེད་སྲིང་བྱེད་ དགོས། ལས་བྱེད་པའི་གོ་གནས་སྤར་སྐབས། སྤྱོད་ཡོན་གཉིས་ལྡན་གྱི་མི་ཁོ་ན་བསྐོ་གཞག་བྱེད་དགོས་པ་ལས། རང་གི་གཉེན་ཉེ་ཁོ་ན་བསྐོ་བཞག་བྱས་མི་ཆོག ད་ལྟ་ས་ཆ་ཁ་ཤས་སུ་རང་གི་ལྟག་སྒོ་ཆུང་བའི་ནང་ནས་འགོ་ཁྲིད་ཀྱི་གོ་གནས་ཐོག་ཏུ་ ཡོང༌། དེ་ནི་མི་འགྲིག ངེས་པར་དུ་ནུས་རྩལ་ངོ་མ་ཡོད་པ་དང༌། ཏང་གི་ལས་དོན་དང་མི་དམངས་ཀྱི་ལས་དོན། མི་ཡོངས་ཀྱི་ཆེད་དུ་འབད་པའི་མི་འགོ་ཁྲིད་ཀྱི་གོ་གནས་སུ་སྤར་དགོས། དེ་མི་གང་འདྲ་ཞིག་ཡིན་པར་མི་བལྟ་བ་དང༌། ཐ་ན་རང་ལ་ངོ་རྒོལ་བྱས་པ་མ་ཟད། ངོ་རྒོལ་བྱས་པ་ནོར་བའི་མི་ཡིན་རུང་འགོ་ཁྲིད་གོ་གནས་སུ་སྤར་དགོས། འདི་ལྟར་སྤར་ན་ཁོ་ལའང་སེམས་འགུལ་ཐེབས་ཐུབ། ང་ཚོས་ངེས་པར་དུ་ཏང་གི་ཁེ་ཕན་མི་དམངས་ཀྱི་ཁེ་ཕན་དེ་བྱ་བ་མཐའ་དག་གི་དང་པོར་ འཇོག་དགོས། དེ་ཡང་རང་གི་དོན་དག་གཅིག་ཀྱང་མ་སྒྲུབ་ཟེར་བ་མིན། དེ་དོན་དངོས་དང་མི་མཐུན་པ་རེད། མི་བཞི་ཚོགས་ཁག་གི་སྐབས་ཁ་རྒྱག་ཆེས་ཆེན་པོ་རེད། དོན་དངོས་ཐོག་ཁོ་ཚོའི་སྒེར་སེམས་གཞན་ལས་ཆེ། ཁོ་ཚོས་ཁ་ནས་སྤྱོ་དོན་ཁོ་ན་མ་གཏོགས་མི་བཤད། དོན་དངོས་ཐོག་སྒེར་དོན་རྐྱང་རྐྱང་བསྒྲུབས་པ་རེད། ང་ཚོས་དེ་འདྲ་བྱེད་མི་རུང༌། ཚང་མས་སློབ་གསོའི་བྱ་བར་མཐོང་ཆེན་བྱེད་དགོས། བཅིངས་འགྲོལ་བྱས་པའི་ཚུན་ལ་མི་རིགས་ལས་བྱེད་པ་འགའ་སྐྱེད་སྲིང་བྱས། ཡིན་ན་ཡང་མང་ཆེ་བ་ནི་སྲིད་འཛིན་མི་སྣ་ཡིན། ལག་རྩལ་ལས་བྱེད་པ་ཅུང་ཙམ་ཉུང་བས། ཕྱོགས་སོ་སོའི་ཤེས་ལྡན་མི་སྣ་མང་པོ་སྐྱེད་སྲིང་བྱེད་དགོས་མང་ཚོགས་ཚང་མས་རང་ གི་བུ་བུ་མོ་སློབ་གྲྭར་ཧུར་ཐག་སྒོ་ནས་ཞུགས་སུ་འཇུག་རྒྱུའི་རེ་བ་ཞུ། ང་ཚོ་གྲངས་ཉུང་མི་རིགས་ཀྱི་རིག་གནས་ཆུ་ཚད་དམའ་བས་གྱོང་ཆེན་པོ་རག་པ་རེད། དེར་བརྟེན་ཚང་མས་འདིའི་ཐད་མཉམ་འཇོག་བྱེད་དགོས། ༡༧ཆོས་ལུགས་བྱ་བ་ཧ་ཅང་གལ་ཆེ། ད་ལྟ་མཐོང་ཆེན་བྱས་པ་མི་འདང༌། མང་ཚོགས་རྣམས་ཆོས་ལུགས་ལ་ལྷག་བསམ་དེ་འདྲ་ཆེ་བར། ཁྱོད་དགའ་ཡང་ཆོག་ལ་མི་དགའ་ཡང་ཆོག དེ་ནི་དོན་དངོ་མ་ཡིན་པ་དང་ལོ་སུམ་ཅུའི་རིང་གི་ཉམས་མྱོང་ཡིན། ད་ཐེངས་ཀྱི་མི་དམངས་འཐུས་མི་འཚོགས་ཆེན་ཐོག་ཏུ་ངས་བཤད་མྱོང༌། ང་ཚོས་ཆོས་ལུགས་ཀྱི་དངོས་པོ་མེད་པར་བཏང་ཟིན་ན་ཡང༌། ཆོས་ལུགས་ཀྱི་བསམ་པར་ཡར་སྐུལ་བྱས་པ་རེད། ང་ཚོས་དགོན་པ་མང་ཆེ་བ་བཤིག་པ་དང༌། གྲྭ་བ་ཕལ་ཆེར་སྐྱ་སར་ཕབས་པ་རེད། ང་ས་ཆ་མང་པོ་ཞིག་ལ་སོང་མྱོང༌། མི་དམངས་མང་ཚོགས་ཁྲི་ཚོ་འགའ་ཡིས་ང་ལ་འཇལ་བ་རེད། འོན་ཀྱང༌། ད་ཐེངས་ཀྱི་འདི་འདྲའི་དགོས་གལ་ཆེ་བ་དང༌། འདི་འདྲའི་ལྷག་བསམ་རྣམ་པར་དག་པ་ཡོད་མ་མྱོང༌། འདིའི་རྒྱུ་མཚན་ཅི་ཡིན་ཟེར་ན། རིག་གནས་གསར་བརྗེ་ཆེན་པོའི་སྐབས་སུ་མི་རྣམས་ལ་ཆོས་ལུགས་ཀྱི་བྱ་འགུལ་མེད་པ་ དང། བླ་མ་ལ་འཇལ་མ་མྱོང་སྟབས་སྐོམ་པ་ཆུ་འདོད་ལྟར་ཆུ་འཐུང་ཟིན་རུང་ད་དུང་འཐུང་ འདོད་སྐྱེས་པ་དང་འདྲ། དེས་ཆོས་ལུགས་བྱ་བ་གལ་ཆེ་བའི་རང་བཞིན་དངམི་རིགས་དང་མི་དམངས་མང་ཚོགས་ཀྱི་ འབྲེལ་བར་ཐུགས་པ་གསལ་བཤད་བྱས། དེར་བརྟེན། རིམ་པ་སོ་སོའི་མགོ་ཁྲིད་བློ་མཐུན་ ཚོས་བྱ་བ་འདིར་མཐོང་ཆེན་བྱེད་དགོས

About ལས་འབྱེད།

Leave a Reply

Your email address will not be published.