མི་སྣ་གལ་ཆེན་ངོ་སྤྲོད་།

མདོ་སྔགས་རིག་གནས་དང་བཅས་པར་གཞན་དྲིང་མི་འཇོག་པའི་མཁས་པའི་དབང་བོ་རྗེ་འཇིགས་མེད་ཐེག་མཆོག་ལགས་ནི་རབ་བྱུང་བཅུ་དྲུག་པའི་ཤིང་རྟ་ཕྱི་ལོ1954ལོའི་ཟླ6པའི་ཚེས13ཉིན་རེབ་གོང་གསེར་མོ་ལྗོངས་ཞེས་པའི་ཡུལ་གྱི་ལེ་ལག སྨད་པ་ཧ་ར་བ་དྷི་ཞེས་བྱ་བར་ཡབ་འཕགས་པ་སྐྱབས་དང་ཡུམ་ཀླུ་མོ་བྱམས་གཉིས་ཀྱི་སྲས་སུ་སྐུ་འཁྲུངས། ཚེ་ཏན་ཞབས་དྲུང་རྗེ་འཇིགས་མེད་རིགས་པའི་བློ་གྲོས་མཆོག་གིས་མིང་ལ་རྡོ་རྗེ་ཚེ་བརྟན་ཞེས་འདོགས་གནང་མཛད་ཅིང་། སེམས་དཔའ་ཆེན་པོ་རྗེ་ངག་དབང་ཆོས་ལྡན་གྱི་སྐུའི་སྒྱུ་འཕྲུལ་དུ་ངོས་འཛིན་མཛད།

རིས་མེད་ཀྱི་རྒྱལ་བསྟན་སྤྱི་དང་བྱེ་བྲག་གསང་ཆེན་སྔ་འགྱུར་རྙིང་མ་པའི་བསྟན་པ་ལ་བཀའ་དྲིན་བླ་མེད་དུ་ཆེ་བ་དར་ཐང་མཆོག་སྤྲུལ་ཀུན་དགའ་དགེ་ལེགས་ཡེ་ཤེས་རྡོ་རྗེ་རིན་པོ་ཆེ་མཆོག་ནི།  ཡབ་སོག་སྤྲུལ་པདྨ་ཐེག་མཆོག་དང་།ཡུམ་གསའ་བཟའ་ངག་ལྷ་གཉིས་ཀྱི་སྲས་སུ་བོད་རབ་རྒྱལ་ཤིང་ཕག་ཕྱི་ལོ་༡༩༣༥ལོར་མདོ་སྨད་མགོ་ལོག་ཏུ་སྐུ་འཁྲུངས།ཆུང་ངའི་དུས་ནས་ཡི་གེ་འབྲི་ཀློག་ལེགས་པར་སྤྱངས་ཏེ་ཡབ་རྗེ་སྔགས་འཆང་དང་།རྒྱ་ངག་མཁན་པོ་འཇིགས་དཔལ་སོགས་ལས་ཆོས་བཀའ་མང་པོ་གསན།  

གངས་ལྗོངས་ཀྱི་ཐོན་མི་གཉིས་པ་རྗེ་བཙུན་དམུ་དགེ་བསམ་གཏན་རྒྱ་མཚོ་མི་འཇིགས་དབྱངས་ཅན་དགའ་བའི་བློ་གྲོས་དཔལ་བཟང་བོ་མཆོག་ནི་མདོ་སྨད་རྟའི་ཆོལ་ཁའི་ལྷོ་རྒྱུད། དེང་སྐབས་ཀྱི་སི་ཁྲོན་རྔ་བ་ཁུལ་ཟུང་ཆུ་རྫོང་གི་ཁོངས་གཏོགས། དམོད་དགེའམ་དམུ་དགེ་རུ་གྲགས་པའི་སར་རོང་སྡེ་སོག་པོ་རུ་ཞེས་པའི་གྲོང་ཚོ་དེར་རབ་ཚེས་ཤིང་སྟག(སྤྱི་ལོ1914)ལོར་ཡབ་དགེ་འདུན་སྐྱབས་དང་ཡུམ་ཨ་ཚེ་གཉིས་ཀྱི་སྲས་སུ་སྐུ་འཁྲུངས།